BENDISYON (Tula ni Tatay)

(Sa kasal nina Mario at Sining)

Munting kapilyang lunan ng kasal
Langit-langitan duyan ng magkasintahan.

Hininga ng kandila ang ulap-ulapang
Pakpak ng ligayang noon pa inasam.

Panginoon,
Tunghayan ang bagong kasal,
Pangaraap nilang langit gawing totohanan,
Pinag-isang puso'y bigkising matibay.
Tulutang walang hanggan ang pagsisintahan.
Pagsapit ng dilim, itanglaw ang buwan,
Sabugan ng bituin ang pagsusumpaan,
Pagdating unos, iyong ipatanaw
Bukas may bubukad na bukang-liwayway.

Bulong na dalangin
Paalingawngawin,
Ipagdiwang natin
Tagumpay ng paggiliw.

Panginoon, pagpalain
Sina Mario at Sining.


Saint Pancratius Chapel
30 October 2010